Nuchhungi English Medium School hmeichhe hockey khel thiamte thlalak

Sport hian Mizo-te rilru a luah hneh hle. A ni khawvel hian sport hi a ngaisang. Infiamna hian taksa leh rilru a thunun a, sual lam kawng zawh tur mi tam tak a hruai tha thei. A hmei a pain, a pui a pang hi sport leh a kaihhnawih hian min chim vel reng a, inkhel thiamte chanchin chhiar tur a awm reng bawk. Hnahthial atang pawhin Sport lama mi ngaihsanawm an lo chhuak tawh thin. India ram huapa football star lar Jeje Lalpekhlua pawh Hnahthial khua ngat a ni. Infiamna khel mual nei tha lem lo mah ila, zirlai talent nei tha tak tak te hian school levela tuipuina leh enkawlna tha an dawn chuan infiamna lamah hmasawnna a thlen thei. 'Education chu all round development' a nih avangin sport hi a serh zinga a mei ang a ni a, hmaih theih a ni lo. School routine pangngaia game hun a awm piah lamah tournament leh Zonal Sport vela theihtawp chhuahin Hockey Tournament-ah te tel ve thin a ni. A chunga thlalaka lo langte khi Nuchhungi English Medium School hmeichhe hockey team an ni a, tournament-ah semi-final an lut a, eng emaw rokhawlhna avangin an khel ta lo a ni. A bikin Mizo hmeichhe tan chuan hockey hian future a nei tha a, India rama player tha pawl zingah Mizo hmeichhia an tel ve fo mai. CCE leh sport hi a kal kawp tlat a, school tha chuan enga mah hi a hmaih thiang lo. Mizo hmeichhia leh hockey hi thil inhmeh tak a ni a, sport lam ti thei deuh Mizo nulate chuan hei hi uar leh zual a fuh ngei ang.

Mizo hmeichhiate hi hockey lamah hian an duai lo hle tih kan hre thin a, sport discipline dang ai hian tih tak zeta bei tan chuan hockey-ah hian hlawhtlinna chance a tam zawk awm e. Mahse, a tlangpui thuin Mizo thalai zingah hockey hian ngaihsan a hlawh ta lem lo niin a lang.

Tlema han hrual deuh chuan Mizo hmeichhia-te hian hockey hi an khel thei fu zel si a, talent nei tha deuh tal hi chu zirtirna tha tak hnuaia hrual chuan Mizo tihmingthatu an ni thei ngeiin a rinawm. School level-ah pawh hian a theih ang leh remchan ang zela hockey hi chawisan a, Mizo naupang leh tleirawlte chher chhoh zel hi a tul hle. Nuchhungi English Medium School hmeichhe tleirawlte pawh hi hun tlem te chhunga han hrual hlek pawhin rin ai takin an khel ve thei phian zel mai. Mizo Hmeichhe zingah Mizo super models emaw, miss Mizoram contest leh Mizoram fashion show vela tel lo tur chi tan pawh pian nalh leh hmeltha nih a tul em em lohna hmun a ni a, remchang lak thiam chuan mahni intun nunna kawng tha tak a ni thei ngei ang. Inkhel tak tak tur erawh chuan hrisel that leh taksa leh rilru vawn fit reng a ngai a, chu chu infiamnain a ken tel thil tha tak a ni. Hmeichhia te tiangkawm nena han inkhelh deuh rap rap hi a nu zan lo a ni thei. Tunlai Mizo mipa inzai no siak ang em chu a ni lo. Inkhel en peih tamna ramah hian a hlu a ni. Hmeichhe chakna thahrui (strength of women) sawr chhuah dan ngaihtuah kawngah school zirtirtu leh school naupangte an tanrual a, hmeichhe mizia leh theihna thlir chunga inkaihhruaina tha neih a tul. Hockey stick hrim hrim hi Mizo hmeichhiate, a bikin nula ni mekte hian an khal tam lo hle a, school bila sticks nei lo hi a tam zawk an ni maithei. Hei vang hian hockey lama hmeichhiate theihna kan hmu chhuak nep hle. Hmalam pana bawh ruak ruak hi kan tih makmawh niin a lang.

Hmeichhe no nem leh sakruang dimdawih tan chuan hockey game hi a rum hle a, invuak leh chhut, inchhuih leh inhliam palh a awl a, taksa fit leh hrisel nih a ngai a, chu chu Mizo hmeichhe tam takin an tlin loh thin pakhat a ni fo. Mizo nula inti no leh inti hmeltha tak, chakna thahrui nei lo ang maia zawi deuh ngiai leh chutianga awm chu changkanna emaw ti tlatte tan chuan khelh ve chi a ni lo. An che chhe lo lo ngai lo. Che chhe lo thei tur chuan an mizia leh rilru puthmang a hriam deuh hraih a ngai. Hei vang tak hian hmeichhe nazawng tan khelh ve ngawt chi chu a ni hauh lo ang. Phur lo leh lu na deuh bur chung pawha a tul dan anga insang mar thei mi nih a ngai a, Mizo hmeichhiate hian chutiang ni tur chuan theihna leh finna, paukhauhna leh remhriatna an nei tawk a, enkawlna leh kaihhruaina tha an mamawh ang an hmuh chuan an tan a huphurhawm lo a, Mizo mipate ai mah hian beisei tur an nei sang mah emaw tih tur a ni.